ဆက်သွယ်ရေးဥပဒေ ပုဒ်မ-၆၆(ဃ)

 ❑ ဆက်သွယ်ရေးဥပဒေ ပုဒ်မ-၆၆(ဃ)

            သိကောင်းစရာများ

     (ပြည့်စုံသော ရှင်းလင်းချက်)

❉

❍ ဆက်သွယ်ရေးဥပဒေ ပုဒ်မ-၆၆(ဃ) သည် ဆက်သွယ်ရေးကွန်ရက် (သို့မဟုတ်) လူမှုကွန်ရက် (Social Media) အသုံးပြုမှုမှတစ်ဆင့် ပေါ်ပေါက်လာသော ပြစ်မှုကျူးလွန်ခြင်းများကို အဓိကထား၍ ပြဋ္ဌာန်းထားသည့် ပုဒ်မဖြစ်၍ အရေးယူနိုင်ပါသည်။

________________________________________

၁။ ပြစ်မှုမြောက်သော အဓိကလုပ်ရပ်များ 

      ❍ ဆက်သွယ်ရေးကွန်ရက်တစ်ခုခုကို အသုံးပြု၍ ပုဂ္ဂိုလ်တစ်ဦးဦးအား အောက်ပါ ပြစ်မှုများ ကျူးလွန်ပါက ပြစ်ဒဏ် ချမှတ်ခြင်း ခံရမည်။

▪️ (က) ခြောက်လှန့်တောင်းယူခြင်း 

      ❍ ဆက်သွယ်ရေးကွန်ရက်များကို အသုံးပြု၍ ပစ္စည်း၊ ငွေကြေး သို့မဟုတ် အခြားအကျိုးအမြတ်တစ်ခုခုကို ရယူရန် ရည်ရွယ်၍ ခြိမ်းခြောက်ပြီး တောင်းယူခြင်း။

• ဥပမာ

⊕  အွန်လိုင်းကွန်ရက် (Video Call သို့မဟုတ် Chat) မှ ရရှိထားသော လျှို့ဝှက်ဓာတ်ပုံ/ဗီဒီယိုများကို ဖြန့်ဝေမည်ဟု ခြိမ်းခြောက်ခြင်း။

⊕ ကွန်ပျူတာစနစ်အတွင်းသို့ ဗိုင်းရပ်စ်ထည့်သွင်းကာ အရေးကြီး Data Files များကို ပိတ်ဆို့ထားပြီး ငွေညှစ်ခြင်း (Ransomware)။

⊕ Website/Social Media Account ကို ခိုးဝင်ထိန်းချုပ်ပြီး Account ပြန်မပေးဘဲ ပိတ်ဆို့ထားခြင်း။

 ▪️(ခ) အသရေဖျက်ခြင်း (Defamation)

     ❍ အင်တာနက်/ကွန်ရက်ကို အသုံးပြု၍ တစ်စုံတစ်ဦး၏ ဂုဏ်သိက္ခာကို အတိအလင်း ထိခိုက်စေသည့် မှားယွင်းသော သို့မဟုတ် ပုဂ္ဂလိကဆန်သော စွပ်စွဲချက်များ ကို လူအများသိအောင် ထုတ်ပြန်ခြင်း။

• ဥပမာ:

⊕ ယခင်ချစ်သူ/အိမ်ထောင်ဖက် သို့မဟုတ် တစ်စုံတစ်ဦး၏ အလွန်ပုဂ္ဂလိကဆန်သော၊ အရှက်ရစေမည့် အဖြစ်အပျက်များကို Facebook Live/Post များဖြင့် အများသိအောင် ဖော်ထုတ်ခြင်း။

⊕ လူမှုကွန်ရက်တွင် ရည်ရွယ်ချက်ရှိရှိဖြင့် လူတစ်ဦးချင်းစီကို အမည်တပ်၍ ဆဲဆိုခြင်း သို့မဟုတ် မဟုတ်မမှန် စွပ်စွဲခြင်း။

⊕ အမှန်တရားဖြစ်သော်လည်း၊ ၎င်းကို အများပြည်သူအကျိုးမဟုတ်ဘဲ ပုဂ္ဂလိက နစ်နာမှုအတွက် ဖော်ထုတ်ခြင်း။

▪️ (ဂ) နှောင့်ယှက်ခြင်း 

     ❍ ကွန်ရက်ကို အသုံးပြု၍ တစ်စုံတစ်ဦးအား စိတ်အနှောင့်အယှက်ဖြစ်စေရန်၊ စိတ်ဖိစီးမှုပေးရန် သို့မဟုတ် ၎င်း၏ ပုံမှန်လုပ်ငန်းဆောင်တာများကို ထိခိုက်စေရန် အကြိမ်ရေများစွာ ပြုလုပ်သော မလိုလားအပ်သည့် ဆက်သွယ်မှုများနှင့် အပြုအမူများ။

• ဥပမာ:

⊕ လူမှုကွန်ရက်ပေါ်ရှိ Post တိုင်းတွင် မုန်းတီးမှုအခြေခံသည့် စကားလုံးများ၊ ဆဲဆိုမှုများဖြင့် အဆက်မပြတ် လိုက်လံမှတ်ချက်ပေးနေခြင်း။

⊕ တစ်ဖက်လူက အကြိမ်ကြိမ် ငြင်းဆန်ထားသည့်တိုင် အချိန်မတော် မလိုလားအပ်သော မက်ဆေ့ခ်ျ သို့မဟုတ် Call များဖြင့် နေ့စဉ်မပြတ် ဆက်သွယ်နေခြင်း (Cyberstalking)။

 ▪️(ဃ) ခြိမ်းခြောက်ခြင်း

     ❍  ကွန်ရက်ကို အသုံးပြု၍ တစ်စုံတစ်ဦးအား ရုပ်ပိုင်းဆိုင်ရာ ထိခိုက်နစ်နာစေရန်၊ ဂုဏ်သိက္ခာကို အကြီးအကျယ် နစ်နာစေရန် သို့မဟုတ် ပိုင်ဆိုင်မှုကို ဖျက်ဆီးပစ်ရန် ရည်ရွယ်၍ ကြိမ်းဝါးပြောဆိုခြင်း။

• ဥပမာ:

⊕ အွန်လိုင်း Message Box မှတစ်ဆင့် "ငါ မင်းကို လာပြီး ရိုက်နှက်မယ်" သို့မဟုတ် "မင်းကို သတ်ပစ်မယ်" ဟူ၍ တိုက်ရိုက် ရေးသားခြင်း။

⊕ ငွေကြေးအငြင်းပွားမှုတစ်ခုတွင် "ငွေမပေးရင် မင်းရဲ့ အိမ်/ကားကို မီးရှို့ပစ်မယ်" ဟု ခြိမ်းခြောက်စာပို့ခြင်း။

________________________________________

၂။ ပုဒ်မ ၆၆(ဃ)၏ သက်ရောက်မှု 

    ❍ ပုဒ်မ ၆၆(ဃ) သည် အောက်ပါ ပုဂ္ဂိုလ်၊ ဌာန၊ အဖွဲ့အစည်းများနှင့် သက်ဆိုင်စေရမည်။

• (က) ပြည်တွင်း

⊕ မြန်မာနိုင်ငံ နယ်နိမိတ်အတွင်းရှိ မည်သည့်ပုဂ္ဂိုလ်၊ ဌာန၊ အဖွဲ့အစည်းနှင့်မဆို သက်ဆိုင်သည်။

• (ခ) ပြည်ပ

⊕ ပြည်ပရောက်ရှိနေသော မြန်မာနိုင်ငံသားများ နှင့်လည်း သက်ဆိုင်သည်။

 (ဆိုလိုသည်မှာ နိုင်ငံခြားတွင် နေထိုင်သည့် မြန်မာနိုင်ငံသားတစ်ဦးက ပြည်တွင်းမှ သို့မဟုတ် ပြည်ပမှ အခြားတစ်ဦးကို အွန်လိုင်းမှတစ်ဆင့် ပြစ်မှုကျူးလွန်လျှင် ဤဥပဒေဖြင့် အရေးယူခံရနိုင်သည်)။

________________________________________

၃။ ပြစ်ဒဏ်

    ❍ ဆက်သွယ်ရေးကွန်ရက်တစ်ခုခုကို အသုံးပြု၍ အထက်ပါပြစ်မှုများ ကျူးလွန်ကြောင်း ထင်ရှားပါက

⊝ ထောင်ဒဏ် (၂) နှစ်ထက်မပိုသော ထောင်ဒဏ်ဖြစ်စေ၊

⊝ ငွေဒဏ် ကျပ် (၁၀) သိန်းထက်မပိုသော ငွေဒဏ်ဖြစ်စေ၊

⊝ ဒဏ်နှစ်ရပ်လုံး ဒဏ်နှစ်ရပ်လုံးဖြစ်စေ ချမှတ်ခြင်း ခံရမည်။

_______________________________________

အချုပ်အားဖြင့်

  ❍ ဆက်သွယ်ရေးကွန်ရက်နှင့် လူမှုကွန်ရက်များ အသုံးပြု၍ ခြောက်လှန့်တောင်းယူခြင်း၊ အသရေဖျက်ခြင်း၊ နှောင့်ယှက်ခြင်း၊ ခြိမ်းခြောက်ခြင်း စသည့်လုပ်ရပ်များ ကျူးလွန်ခြင်းသည် ဆက်သွယ်ရေးဥပဒေအရ ပြစ်မှုမြောက်ပါသည်။ 

  ❍ ပြောဆိုသည့် အချက်အလက်သည် မှန်သည်ဖြစ်စေ၊ မှားသည်ဖြစ်စေ၊ ပြောဆိုသည့်ပုံစံ၊ အကြိမ်ရေနှင့် ရည်ရွယ်ချက် သည် ကြောက်ရွံ့မှု၊ စိတ်ဒုက္ခ သို့မဟုတ် အန္တရာယ် တစ်ခုခုဖြစ်စေရန် ဖန်တီးပေးခြင်း ဖြစ်နေပါက ပြစ်ဒဏ် ချမှတ်ခံရမည် ဖြစ်သည်။

  [ ဥပဒေရေးရာအထွေအထွေ ဆွေးနွေးရာ]

BY BNT - အထက်တန်းရှေ့နေ   

#BNTLAWYER အား Credit ပေး၍ လွတ်လပ်စွာ ကူးယူမျှဝေနိုင်ပါသည်။

#၆‌၆ဃ #ပုဒ်မ၆၆ #ဆက်သွယ်ရေးဥပဒေ #ပုဒ်မ #အသရေဖျက်မှု #ရှေ့နေ #ဥပဒေ #ခြိမ်းခြောက် #နှောင့်ယှက်